إنجاز-الدكتور محمود الحياصات يكتب ..
بالرغم من كل الإيجابيات المرتبطة بزيادة الوعي والمعرفة في الفضاء الإلكتروني المتسارع اللي عم بنعيشه.. الا إنه السلبية والعشوائية بالنشر بتشكل تحدي كبير للسلم المجتمعي وبتشكل خطر على الامن الرقمي عنا..
يعني في ظل الأحداث المتسارعة اللي بتدور حوالينا والمحيط الملتهب على مختلف الأصعدة.. لس بنشوف الإشاعات وصناعة الوهم.. بدون أدنى إحساس بالمسؤولية بتلاقي البعض بنشر أخبار ومعلومات كاذبة ومفبركة.. وللأسف مثل هاد النوع من الزيف بنتشر زي النار بالهشيم.. إما لخبث النوايا.. أو وبكل أسف لغياب ثقافة التحقق من المصدر..
الشي الثاني هو خطاب الكراهية والجهوية .. يعني المتابع مؤخرًا بلاحظ إنه الكثير من الحوارات الرقمية انزلقت اتجاه النعرات الجهوية ونبرة الاقصاء..
ف بنلاحظ أي خلاف رياضي.. أو سياسي.. أو اجتماعي..بتتوسع هاي الدائرة..وبتشكل خطر كبير على السلم المجتمعي والتماسك اللي بنتغنى فيه..
وكمان في قضية كثير مهمة .. وهي اغتيال الشخصية والتنمر الإلكتروني.. يعني النقد تحول من نقد بناء للصالح العام.. لاغتيال شخصيات وإساءة غير مقبولة.. وهجوم شخصي..وتجريح يطال العائلات..وهاد طبعًا ما في حدا بتقبله..
وكله طبعًا بندرج تحت سبب الركض ورا الترند ومحاولة تعميم سطحية الوعي.. من خلال التركيز على الجوانب السلبية والمأساوية والفضايح..
وهاي الممارسات رح تخلق شعور عام بالسوداوية والسلبية والاحباط للمتلقي.. وبسيء لسمعة البلد بتصدير سمعة غير صحيحة بانه البلد عايش بأزمة أخلاقية وأمنية.. وبطبيعة الحال رح ينعكس على مختلف القطاعات.. الاستثمار والتصدير والسياحة بكل أشكالها العلاجية والدينية والتعليمية وغيرها..
رفقًا بهالبلد الطيب أهله..
