جان بو جدعون يكتب : لوين جايي يا خيي…
مش ناقصني زوّار. السما صارت متل بيروت… الكل مارق، ولا حدا واصل.
هالي :جايي آخد شي مش إلي…
جايي آخد دمع.
دمع؟-
مين بعد بدّو يبكي؟
خلص… خلص البكي.
الأرض شبعت.
وأمي… (يسكت)
أمي نشف دمعها.
لهيك جايي._
فيروز ما عاد معها دمع.
من وقت ما فلّيت إنت…
الوجع عم يبكي عنها…
ذياد _أنا ما فلّيت…
أنا تعبت.
تعبت من بلد بيحبّ الصوت بس بيكره الكلمة،
بيحبّ الأغنية بس بيخاف من معناها.
تعبت شوف أمي واقفة تغنّي
والناس قاعدة تسمع حالها.
هالي _وأنا تعبت شوفها ساكتة.
فيروز لما تسكت…
السما بتصير أوطى.
الغنية لما ما تطلع من تمّها
بتتحوّل دمعة،
والدمعة لما ما تنزل
بتخنق القلب.
ذياد _أمي ما لازم تبكي.
أمي لازم تغنّي،
حتى لو البلد أطرش.
بس أنا…
أنا أخدت معي دمعتها يوم رحت.
يمكن أناني.
يمكن كنت بدّي حسّ إنو بعدني حي بقلبها.
هالي _(يرفع القنينة الفاضية)
وهلق؟
القنينة فاضية.
الدمع خلص.
والقلب بعدو واقف حدّ البيانو
عم ينطر نغمة ما رح تجي.
ذياد _بتعرف شو أصعب شي؟
إنك تكون ابن فيروز
وتحسّ حالك يتيم
وهي بعدها عايشة.
هالي _وأصعب إنك تكون خيو ل زياد
وتحسّ إنو نصّك راح
والنص التاني عم يتمسّك بالصوت
كرمال ما ينهار.
ذياد_إنت جايي تاخد دمع؟
خود…
بس دير بالك.
دمع فيروز تقيل.
مش مي.
تاريخ… وليل… وصباحات بلد
كان بدّو يكون أحسن.
هالي _رح آخدو بحنان.
متل ما كنا ناخد الغنية
من تمّها
ونخبيها بقلبنا
كرمال ما يسرقوها.
ذياد _قُلّا شي…بلا ولا شي
بس تشوفها.
قُلّا إنو السما مش بعيدة.
وإنو الأغاني اللي ما لحّقتها
عم تكمّل هون.
وإنو ضحكتي بعدها عم تزعّج الملائكة.
قُلّا
إنو ابنِك
بعدو عنيد.
بعدو عم يحاول يصلّح البيانو المكسور
بهالعالم…وهلق رح يصلحو ويحط عليه ورقة طابع بإسمي
وإنو لو فيني
كنت رجعت
مش كرمال البلد…
كرمال حضنها.
هالي _(تدمع عيناه)
كنت جايي آخد دمع.
طلعت آخد وجع
وأرجع حامل سما.
(ينظر للبعيد)
ذياد _خُد دمعها
ورجّعلها صوتها.
خُلّيها تغنّي
حتى لو كان الغنيّة
نحيب.
لأنو فيروز
لما بتبكي بصوت
بتعلّم العالم
كيف ما يموت.
هالي يسكّر القنينة على ولا شي…
كيف بدي ارجع وانا مش قادر كافيها خدمتني كاني طفل ..يمكن لازم كون حدّك
اشتقتلك وما قدرت ابكي يوم تركتني
ذياد_تعا لقلبي يا خيي ..وتروك فيروز تهتم فيها إم السما …فوت لضيفك بركة
سماوية ..من دين عمي وبي…فوت..
الله يرحمك يا هالي ويا ذياد ويا عاصي ومنصور والياس ويصبر قلبك يا تاج راسنا يا فيروز ..
اللي متلكن أيقونة بالسما ..
تعازيي الحارة (جان بو جدعون 🙏🙏🙏🙏)
